Видео «БелГазеты»
Опрос онлайн
Координатор кампании «За справедливые выборы» Виктор Корнеенко считает, что «более грязной избирательной кампании, чем прошедшие местные выборы, в Беларуси еще не было». А вам как выборы?
нормально, недорого выпили и закусили на участке
отлично - это было поистине честные и справедливые выборы
я в шоке от использования административного принуждения при досрочном голосовании
не удивился фальсификациям и избирательным «каруселям»
удовлетворен, что оппозиционные кандидаты провалились
Чэрці ў пагонах
05.02.2018, Кiрыл Жываловiч

Наша дзяржава вельмі хоча, каб у грамадстве паважалі чалавека ў міліцэйскай форме. Хацелася б адразу даведацца: за што? Нас пастаянна пераконваюць у тым, што міліцыянер - гэта і абаронца, і праваахоўнік, і слуга закону. А ў паўсядзённым жыцці мы бачым кволых мянтоў, баязлівых слабакоў і злачынцаў у пагонах.

У апошнія гады назiраецца вельмі заганная практыка: у любым канфлікце паміж звычайным грамадзянінам і прадстаўніком праваахоўных органаў па змаўчанні і без высвятлення абставінаў размеркаваныя ролі ахвяры і злачынцы. Любога грамадзяніна адразу ж выстаўляюць у ролі авечкі, ставяцца як да скаціны, як да мяса, як да істоты без права на голас, без права на абарону, без права на справядлівасць.

Гэта ўжо становіцца сумнай традыцыяй - галоўным водгаласам святкавання Новага году аказваецца гучны скандал вакол самавольства і ўсёдазволенасці з боку чалавека ў форме. То канфлікты ў месцах масавых гулянняў, то стральба на лесвічнай пляцоўцы, то неадэкватныя формы паводзін на ўзроўні РАУС. Як выявiлася, нядаўняя навагодняя ноч таксама змясціла ў сябе гісторыю падобнага ганебнага зместу. Толькі праз амаль месяц дэталі гэтай гісторыі сталі вядомыя шырокай грамадскасці. Падзяліцца падрабязнасцямі з журналістамі вырашылася актрыса Святлана Сакалоўская: «Новы год мы адзначалі ў маёй мамы ў Чыжоўцы. Прыкладна ў дзве гадзіны ночы разам з сяброўкамі пайшлі на ёлку каля лядовай арэны. Нас было пяцёра - я, мой хлопец Саша і тры сяброўкі. Пагулялі каля гадзіны, адна дзяўчынка паехала дадому, а мы вырашылі падысці да елкі».

Далей усё адбывалася па добра знаёмым сцэнарыі. Камусьці з супрацоўнікаў міліцыі нешта здалося - і маладыя дзяўчыны апынуліся ўжо ў міліцэйскім аўтобусе. У выніку дзве дзяўчыны прасядзелі ў аддзяленні два дні, а сама Святлана апынулася ў бальніцы са страсеннем мозгоў пасля ўдару дубінкай па галаве... Хіба важныя наогул іншыя падрабязнасці гісторыі, у якой дарослы мужык б'е дзяўчыну дубінкай па галаве? Ці трэба ацэньваць, хто быў завадатарам канфлікту і што стала яго прычынай? Ды і ці можна ўвогуле мець тлумачэнне такому гвалту з боку чалавека ў форме?

Брыдоты ў гэтай гісторыі дадалося, калі прадстаўнікі некаторых сілавых органаў па звычцы сталі даваць першыя неадэкватныя каментарыi таго, што здарылася: «Дубінкай па галаве ніхто не біў»; «усё ў рамках закона»; «а не трэба было грубіяніць»; «міліцыянеры дзейнічалі прафесійна і ў адпаведнасці з інструкцыяй»; «а гэтыя самі вінаватыя»; «знаходзіліся ў стане алкагольнага ап'янення»...

Дарэчы, Святлана Сакалоўская мае на руках пацвярджэнне таму, што была зусім цвярозая ў тую ноч. Гэта па-першае. Па-другое, у якім бы стане яна ні была і як бы сябе ні паводзiла, гэта нікому не дае права біць яе дубінкай па галаве. І па-трэцяе, так атрымалася, што гэтую дзяўчыну я ведаю асабіста. І заўсёды бачыў яе як чалавека вельмі добразычлівага, прыязнага і спагадлівага. Яна ветлівая, інтэлігентная і прыстойная дзяўчына. Так што не атрымаецца пераканаць мяне ў тым, што яна ўяўляе сабой нявыхаванае п'янае быдла. А ўсе зробленыя спробы паказаць сітуацыю ў выгодным для міліцыі святле выглядаюць вартымi жалю і маркотным відовішчам.

Калі ўвагу да таго, што здарылася, праявілі найбуйнейшыя ў краіне інфармацыйныя інтэрнэт-рэсурсы, то каментарыi з сілавых структур сталі набываць іншы характар. Такое таксама здаралася ўжо не раз: як толькі прадстаўнікі праваахоўных органаў разумеюць, што разыграць любімую камбінацыю па выстаўленні людзей ідыётамі не атрымаецца, то і стылістыка ў афіцыйных заявах змяняецца - з хамскай і катэгарычнай яна ператвараецца ў спалоханую і невыразную.

«Высвятляюцца ўсе абставіны, сітуацыя неадназначная», - прызналіся ў адным з ведамстваў тыя ж людзі, якія да гэтага на працягу месяца не звярталі ніякай увагі на інцыдэнт у Чыжоўцы. А як толькі стала зразумела, што не ўсё так проста, то і сітуацыя адразу ж набыла характарыстыкі неадназначнасці. Як толькі запахла смажаным - тут жа заварушыліся найбольш спрытныя і вёрткія прыстасаванцы. Захваляваліся, замітусіліся, зачасаліся. І гэта ж толькі па адной-адзінай прычыне: ім стала страшна, што прыйдзецца адказаць за свае супрацьзаконныя і недапушчальныя дзеянні.

Але ўсіх перапалоханых хочацца супакоіць: ня бойцеся, адказаць вам усё адно давядзецца. Адказаць прыйдзецца не толькі таму, хто ўдарыў дубінкай па галаве безабаронную жанчыну, але і многім іншым. Тым, хто быў гэтаму сведкам, але не спынiў калегу. Тым, хто ведаў пра тое, што здарылася, але маўчаў. Тым, хто да апошняга спрабаваў агаварыць невінаватых людзей. Тым, хто абараняе зло. Тым, хто не абурыўся і не падаў у адстаўку пасля цэлай серыі падобных інцыдэнтаў. І тым, хто не знайшоў у сабе сілы сказаць: «Гэта ганьба. Прашу прабачэння. Мне сорамна за такія ўчынкі калег».

Святлана Сакалоўская настроена рашуча: «Мы будзем дабiвацца справядлівасці і дойдзем да суда». І гэта непазбежна. Усе мы дой-дзем да суда рана ці позна. Дастанецца тады ўсім. І па заслугах, і па законе, і па справядлівасці. А ўсе гэтыя бессаромныя чэрці ў пагонах з д'яблам на чале яшчэ паскачуць на ўласных распаленых патэльнях. І простымі апёкамi на пятках гэтыя танцы для іх не скончацца.

Добавить комментарий
Проверочный код